Kuhva tawlhtu ZPM mi leh sa Sorkarin mit siai khum zel: MNF

by News Editor

Tualchhung News

ZORAM TODAY| 16th July, 2024 (Tuesday): MNF chuan thuchhuah siamin, tunhnaiah Vairengte leh a chhehvela Kuhva rahro bothlau zawn chhuah tuma hmalakna kal zelah, ni 7.7.2024 khan Mizoram Police te chuan Phaisenah 407 trip khat leh an lakchhuahna Kudam atangin bag 145 vel man chhuah a nih thu puanzar a ni a. He kuhva neitu nia rin hi Lalchhuanliana, Ruantlang a nih thu tarlan a ni bawk.

Lalchhuanliana, Ruantlang hi ZPM Champhai S Block Information Jt. Secy. nia hriat a ni a, a unaunu hi Ruantlang ZPM VC member niin, a unaunu pasal hi ZPM Champhai S Block President nia hriat a ni bawk. Phaisen a kuhva lo chheprelh saktu pawh hi Lalṭanpuia, Phaisen ZPM secretary a nih thu leh an inhnuai kudam atanga manchhuah a nih thu hriat a ni bawk, tiin MNF thuchhuah ah tarlan a ni.

MNF chuan, heta tanga langchiang tak chu an sawrkar atanga thlakhat chhunga dan lova bungraw tawlh tihtawp tum ZPM sawrkar hian tihtawp chu sawi loh, a tawlh thin tute zinga ZPM mi leh sa chu an mit an la siai khum zel tih a tilang chiang hle mai a. An thil chin tenawm tak hi bansan thuai se kan duh takzet a ni, an ti.

ZPM Sawrkar hian Mizoram chhunga Kuhva chingtute harsatna tawh mek a ngaihthah zia leh an mi leh sate hlawkna tura an thilsual tih pawh anla ngaihhnathiam zel a ni tih a tilang chiang hle ah kan ngai a ni, tiin an tarlang.

Kuhva bag 5000 chuang bo hi chhui chhuak a, a rutu chungah hremna lek ngei turin kan phut bawk a ni, MNF chuan an ti.